அடாவடித்தனம் புரியும் மட்டு.விகாராதிபதிக்கு எதிராக போராட வேண்டி ஏற்படும்

5.3.14

மட்டக்களப்பு, பட்டிப்பளை பிரதேச செயலாளரை இடமாற்றுமாறு கோரிக்கை விடுவதற்கு மங்களராமய விகாராதிபதி அம்பிட்டியே சுமங்கள தேரருக்கு எந்த அருகதையும் இல்லையென பாராளுமன்ற உறுப்பினர் பா.அரியநேத்திரன் தெரிவித்துள்ளார். நேற்று மட்டக்களப்பில் சிங்கள ராவய அமைப்பின் மூலம் மேற்கொள்ளப்பட்ட ஆர்ப்பாட்ட பேரணி தொடர்பில் கருத்து தெரிவிக்கும்போதே அவர் இவ்வாறு தெரிவித்தார்.

  இது தொடர்பில் மேலும் கருத்து தெரிவித்த அவர், மட்டக்களப்பு மாவட்டத்தின் பட்டிப்பளை பிரதேச செயலாளர் பிரிவுக்குட்பட்ட புளுக்குனாவ மற்றும் கெவிலியாமடு ஆகிய பகுதிகளில் மேற்கொள்ளப்பட்டுவரும் சட்ட விரோத குடியேற்றங்களுக்கு சட்ட ரீதியான அனுமதியினை யாரும் வழங்க முற்பட்டால் அவர்களுக்கு எதிராகவும் இந்த குடியேற்றங்களை அடாவடியாக மேற்கொண்டுவரும் பௌத்த தேரருக்கு எதிராகவும் மக்களை ஒன்றுதிரட்டி போராடவேண்டிய சூழ்நிலையேற்படும்.

  புளுக்குனாவையில் 55 சிங்கள குடும்பங்களும் மற்றும் கெவிலியாமடு பகுதியில் 250 சிங்கள குடும்பங்களும் யுத்த காலப்பகுதியில் வசித்துவந்தபோது அவர்களின் நிர்வாகம் உகண பிரதேச செயலகத்துடன் இணைக்கப்பட்டிருந்தது. யுத்தம் முடிவுக்கு கொண்டுவரப்பட்டதன் பின்னர் அவர்கள் பட்டிப்பளை பிரதேச செயலாளர் பிரிவுடன் இணைக்கப்பட்டிருந்தனர். அவர்களுக்கு தேவையான உதவிகள் பிரதேச செயலகம் ஊடாக மேற்கொள்ளப்பட்டு வருகின்றது.

அதனை நாங்கள் ஒருபோதும் எதிர்க்கவில்லை. பட்டிப்பளை பிரதேச செயலாளர் பிரிவில் 24 கிராம சேவையாளர் பிரிவுகள் உள்ளது.அதில் ஒரு கிராமசேவகர் பிரிவான கச்சக்கொடி சுவாமிமலை பிரிவிலேயே கெவிலியாமடு உள்ளது. அங்கு மட்டக்களப்பு மங்களராமய விகாராதிபதி அம்பிட்டியே சுமங்கள தேரர் அத்துமீறி அடாவடித்தனமாக 33குடும்பங்களுக்கு வீடுகளை அமைத்து அங்கு அத்துமீறிய குடியேற்றத்தினை செய்துள்ளார். அவர்களுக்கு வதிவிடத்தினை உறுதிப்படுத்தி நிரந்தரமாக்குமாறு கோரியே இந்த ஆர்ப்பாட்டம் நடத்தப்பட்டுள்ளது.

 அத்துமீறி குடியேறியவர்களுக்கு நிரந்தர வதிவிட சான்றிதழ் நியாயமற்ற செயலாகும். அதேபோன்று பட்டிப்பளை பிரதேச செயலாளரை இடமாற்றுமாறு கோருவதற்கு மங்களராமய விகாராதிபதி அம்பிட்டியே சுமங்கள தேரருக்கு எந்த அருகதையும் இல்லை. அவர் பட்டிப்பளையை சேர்ந்தவரும் அல்ல, மட்டக்களப்பு மாவட்டத்தினை சேர்ந்தவரும் அல்ல. இதனை மட்டக்களப்பு மாவட்ட செயலாளருக்கு நாங்கள் தெளிவாக கூறியுள்ளோம். இரு மாதங்களுக்கு முன்னர் குறித்த தேரர் பட்டிப்பளை பிரதேச செயலகத்துக்குள் நுழைந்து பிரதேச செயலாளரை தாக்கமுற்பட்டதுடன் சொத்துகளுக்கும் சேதம் விளைவித்திருந்தார். இது தொடர்பான வழக்கு நீதிமன்றிலும் உள்ளது.

இது தொடர்பான நீதிமன்ற தீர்ப்பினை எதிர்பார்த்துள்ள நிலையில் குறித்த தேரர் மக்களை திரட்டி சிங்கள ராவய என்ற பெயரில் ஆர்ப்பாட்டத்தினை மேற்கொண்டுள்ளார். இந்த ஆர்ப்பாட்டத்தில் கலந்து கொண்டவர்களில் எவரும் கெவிலியாமடு பிரதேசத்தினை சேர்ந்தவர்களும் இல்லை.வேறு பகுதிகளில் இருந்து மக்களை கொண்டுவந்து இந்த ஆர்ப்பாட்டத்தினை மேற்கொண்டுள்ளார். சட்டவிரோதமாக கட்டப்பட்ட வீடுகளுக்கு எவரும் நிரந்தரவதிவிட உறுதிப்பத்திரம் வழங்கமுற்பட்டால் அவர்களுக்கு எதிராகவும் இவ்வாறான நடவடிக்கையில் ஈடுபட்டுள்ள பௌத்த தேரர்களுக்கு எதிராகவும் மட்டக்களப்பு மாவட்ட மக்களை ஒன்றுதிரட்டி போராட வேண்டிய நிலை தவிர்க்க முடியாததாக மாறிவிடும். ஏற்கனவே குறித்த பிரதேசங்களில் இருந்தவர்கள் மீள்குடியேற்றப்படுவதையோ அவர்களுக்கு நிரந்தர சான்றிதழ் வழங்குவதையோ நாங்கள் எதிர்க்கவில்லை.

 சட்ட விரோத குடியேற்றங்களை யார் மேற்கொண்டாலும் தமிழ் தேசிய கூட்டமைப்பு எதிர்க்கும். கெவிலியாமடு அத்துமீறிய குடியேற்றம் தொடர்பில் ஏற்கனவே தமிழ் தேசிய கூட்டமைப்பு வழக்கு தாக்கதல் செய்துள்ளது.இவ்வாறான நிலையில் அரசியல் செல்வாக்குடனும் பாதுகாப்பு தரப்பினரின் உதவியுடனும் இவ்வாறான செயற்பாடுகளை மேற்கொள்வது கண்டனத்துக்குரியதாகும். இவ்வாறான ஆர்ப்பாட்ட நடவடிக்கைகளை தமிழ்த் தேசிய கூட்டமைப்பும் செய்யும் என்பதை கூறிக்கொள்கிறேன். சட்டவிரோத குடியேற்ற நடவடிக்கைகளுக்கு யாராவது துணைபோவார்களால் அவர்களை நாங்கள் துரோகிகளாக நோக்க வேண்டிய நிலையே ஏற்படும் என்றார்.

சிங்கள ராவய மட்டக்களப்பில் ஆர்ப்பாட்ட பேரணி மட்டக்களப்பு பட்டிப்பளை பிரதேச செயலாளரை இடமாற்றக்கோரி, மட்டு, மங்களராம விகாரையில் இருந்து மாவட்ட செயலகம் வரையில் எதிர்ப்புப் பேரணி விகாராதிபதி அம்பேபிட்டிய சுமணரத்தின தேரர் தலைமையில் இடம்பெற்றுள்ளது. பட்டிப்பளை பிரதேச செயலாளர் பிரிவைச் சேர்ந்த புலுகுணாவ, கெவிலியாமடு பிரதேச சிங்கள் மக்கள், பட்டிப்பளை பிரதேச செயலாளரால் தங்கள் அடிப்படை உரிமைகள் மறுக்கப்படுவதாகவும், அவரை இடமாற்றுமாறு கோரியுமே இந்த ஆர்ப்பாட்டப் பேரணி இடம்பெற்றள்ளது. இப்பேரணியில் சிங்களராவய தேசிய சங்கத்தின் உபதலைவர் ராஜகீய பண்டித பூலத்தே சுதம்ம தேரர், பொதுச் செயலாளர் ராஜகீய பண்டிதஹெல்லே பஞ்சாலோக தேரர் ஆகியோருடன் சிங்கள ராவய தேசிய சங்கத்தின் உறுப்பினர்கள் கெவிலியாமடு புலுகுணாவ பிரதேச சிங்கள மக்கள் ஆகியோர் கலந்து கொண்டனர்.

இப்பேரணியில் கலந்து கொண்டவர்கள், யுத்தத்திற்கு முன்னர் இப்பிரதேசங்களில் வசித்ததாகவும் யுத்தம் காரணமாக இடம்பெயர்ந்து யுத்தம் முடிவுற்றதும் 06 வருட காலமாக பட்டிப்பளை பிரதேச செயலக பிரிவில் வசிப்பதாகவும் தெரிவித்துள்ளனர். எனினும், இதுவரையில் தங்களுக்கு கிரம சேவகர் சான்றிதழ், வதிவுச் சான்றிதழ் போன்றன வழங்கப்படாமல் இருப்பதாகவும் இதற்கு பிரதேச செயலாளர் முட்டுக்கட்டையதாக இருப்பதாகவும் இதற்கு எதிர்ப்புத் தெரிவித்தே இவ்வார்ப்பாட்டப் பேரணி இடம்பெறுவதாகவும் ஆர்ப்பாட்டத்தில் ஈடுபட்ட தேரர்கள் தெரிவித்தனர்.

இவ்வார்ப்பாட்டப் பேரணியானது மட்டக்களப்பு ஸ்ரீ மங்களராம விகாரையில் ஆரம்பித்து மாவட்டசெயலகம் வரை சென்றது பின்னர் அங்கு மாவட்ட அரசாங்க அதிபர் திருமதி பி. எஸ். எம் சாள்ஸ் அவர்களுடன் பேச்சுவார்த்தை இடம்பெற்றது. பின்னர் பட்டிப்பளை பிரதேச செயலாளர் திருமதி வில்வரெட்ணம் அவர்களும் அழைக்கப்பட்டு பேச்சுக்கள் இடம்பெற்றன. முடிவில் தேரர்களினால் முன்வைக்கப்பட்ட கோரிக்கைகளுக்கு அரசாங்க அதிபர் கவனம் செலுத்துவதாகவும் கிராம சேவகர் சான்று தேவைப்படுவோருக்கு தாம் அதனை வழங்குவதாகவும் உறுதியளித்தார்.

  இதன்பின் ஆர்ப்பாட்டம் கைவிடப்பட்டது. மகஜரில் பட்டிப்பளை பிரதேச செயலாளர் பிரிவில் வசிக்கும் பெரும்பான்மையின மக்களின் வதிவிடத்தை உறுதிப்படுத்த வேண்டும். இம்மக்களுக்கான வதிவிடச் சான்றிதழ்கள் வழங்கப்பட வேண்டும், கிராம அலுவலகரின்; சான்றிதழ்கள் வழங்கப்பட வேண்டும் உள்ளிட்ட பல்வேறு கோரிக்கைகளை இவர்கள் மகஜரில் முன்வைத்தனர். பட்டிப்பளை பிரதேச செயலாளர் பிரிவில் 106 பெரும்பான்மையினக் குடும்பங்கள் வசிப்பதாக மட்டக்களப்பு மங்களராமய விகாராதிபதி அம்பிட்டிய சுமனரத்தின தேரர் தெரிவித்தார்.







0 கருத்துக்கள் :