பிரபாகரன் என்ன நிலையில்..! வாய் திறந்தார் கே.பி.

3.9.15

தமிழீழ விடுதலைப் புலிகளின் தலைவர் வேலுப்பிள்ளை பிரபாகரனின் மரணம் தொடர்பில் எவராலும் சரியான தகவல்களை வெளியிட முடியாது என புலிகளின் முன்னாள் சர்வதேச விவகாரப் பொறுப்பாளர் குமரன் பத்மநாதன் எனப்படும் கே.பி தெரிவித்துள்ளார்.
பிரபாகரன் எவ்வாறு உயிரிழந்தார் என்பது பற்றி தோண்டித் தேடுவதனை விடவும், அரசாங்கத்துடன் இணைந்து மக்களுக்கு சேவையாற்றுவதற்கு அனைவரும் இணைந்துகொள்ள வேண்டுமென அவர் வலியுறுத்தியுள்ளார்.

குமரன் பத்மநாதன் பிரபாகரனுடன் மிக நெருங்கிய தொடர்புகளைப் பேணியவர் எனவும், இறுதிக் கட்ட யுத்தத்தின் போதும் தொடர்பு பேணப்பட்டதாகவும் தெரிவிக்கப்படுகிறது.
பிரபாகரனின் இறப்பு பற்றி துல்லியமாக கூற எவராலும் முடியாது என அவர் தெரிவித்துள்ளார்.
இறுதிக் கட்ட யுத்தத்தின் போது, பிரபாகரனுடன் இருந்த தமிழீழ விடுதலைப் புலிகளின் உறுப்பினர்கள் எவரும் உயிருடன் இல்லை என அவர் குறிப்பிட்டுள்ளார்.

சிலருடன் தாம் தொடர்பு கொண்டு கள நிலவரங்களை அறிந்து கொண்டிருந்தபோதிலும் நந்திகடல் பகுதியில் நடைபெற்ற இறுதிக் கட்ட யுத்தத்தின் போது எவரும் உயிருடன் இருக்கவில்லை என அவர் தெரிவித்துள்ளார்.

எனவே பிரபாகரன் எவ்வாறு உயிரிழந்தார் என தற்போது கூறுவது சாத்தியப்படாத விடயமாகும் என அவர் குறிப்பிட்டுள்ளார். முன்று தசாப்த காலமாக நீடித்த யுத்தம் காரணமாக இலங்கையர்கள் பாரியளவில் அழுத்தங்களையும் பிரச்சினைகளையும் எதிர்நோக்க நேரிட்டது என அவர் குறிப்பிட்டுள்ளார்.

இறுதிக் கட்ட யுத்தத்தின்போது தமே அதிகளவு தொடர்புகளைப் பேணி வந்ததாகவும், தம்மாலேயே பிரபாகரனுக்கு என்ன நேர்ந்தது என்பதனை குறிப்பிட முடியாது எனவும் அவர் தெரிவித்துள்ளார்.
சிறுவர் இல்லமொன்றை தன்னார்வ அடிப்படையில் நடத்திச் செல்வதாகவும் அதற்காக நேரத்தை செலவிட விரும்புவதாகவும் அவர் குறிப்பிட்டுள்ளார்.

மாறாக அரசியல் தேவைகளுக்காக தேவையற்ற கருத்துக்களை வெளியிட்டு பரபரப்பை ஏற்படுத்திக் கொள்ள வேண்டிய அவசியம் தமக்குக் கிடையாது என அவர் தெரிவித்துள்ளார்.
READ MORE - பிரபாகரன் என்ன நிலையில்..! வாய் திறந்தார் கே.பி.

சம்பந்தன் எதிர்ப்பு! - இந்தியாவை உதாரணம் காட்டி கண்டனம்

இரண்டு பிரதான அரசியல் கட்சிகள் இணைந்து தேசிய அரசாங்கம் அமைத்திருப்பது தற்காலத்திற்கு அவசியம் என்றும், இது நாட்டிற்கு நன்மை பயக்கும் என்றும் புதிய எதிர்க்கட்சித் தலைவர் இரா.சம்பந்தன் தெரிவித்திருக்கிறார். இலங்கை நாடாளுமன்ற எதிர்க்கட்சித்தலைவராக நியமிக்கப்பட்ட பிறகு முதல்முறையாக நாடாளுமன்றத்தில் உரையாற்றிய சம்பந்தன், இலங்கை அரசை ஆதரிப்பதற்கு நியாயமான காரணங்கள் இருக்கும் அனைத்து விவகாரங்களிலும் தாம் அரசாங்கத்தை ஆதரிப்போம் என்று தெரிவித்தார்.
அதேசமயம், எதிர்க்கட்சிகள் அனைத்துக்கும் தாம் முழுமையான ஆதரவை அளிக்கப் போவதாகவும், எதிர்க்கட்சிகளுடன் நெருக்கமாக ஒன்றிணைந்து இயங்கப்போவதாகவும், செயல்திறன்மிக்க எதிர்க்கட்சியாக இருக்கப்போவதாகவும் சம்பந்தன் கூறினார்.
“எதிர்க்கட்சி வரிசையில் அமர்ந்திருக்கும் அரசியல் கட்சிகள், உறுப்பினர்கள் அனைவருக்கும் ஒரு உத்தரவாதத்தை அளிக்க விரும்புகிறேன். எதிர்க்கட்சிகளின் நிலைப்பாட்டை உறுதிப்படுத்தும் விதமாக உங்கள் அனைவருடனும் இணைந்து செயற்பட நாங்கள் தயங்க மாட்டோம். தேவையேற்படும் போதெல்லாம் அரசுக்கு எதிராக நாங்கள் திறமையானதொரு எதிர்க்கட்சியாக செயற்படுவோம்”, என்றார் சம்பந்தன்.
தேசிய நலனை முன் வைத்துத் தீர்க்கப்படவேண்டிய விவகாரங்கள் பல இருக்கின்றன என்று தெரிவித்த சம்பந்தன், தமிழர் விவகாரம் என்பது நீண்டகாலமாக தீர்வுகாணப்படாமல் புறையோடிப் போயிருப்பதாக கூறினார். இனப்பிரச்சனைக்கு தீர்வுகாண அனைவருடனும் இணைந்து செயற்பட தாம் தயாராக இருப்பதாகவும், இந்த நாட்டுக்கும், நாட்டு மக்களுக்கும் விசுவாசமாக இருக்க வேண்டும் என்றும் அவர் கூறினார். “தமிழர்களின் பிரச்சனைக்கு ஏற்கத்தக்க தீர்வு காண்பது நம் அனைவரின் முதன்மையான கடமை என்பதை நான் வலியுறுத்திக்கூற விரும்புகிறேன்”, என்றார் சம்பந்தன்.
இன்று நாடாளுமன்றம் விவாதத்திற்கு எடுத்துக்கொண்ட மசோதா குறித்து தமது கருத்துக்களை முன்வைத்த சம்பந்தன், இன்றைய காலகட்டத்திற்கு தேசிய அரசாங்கம் என்பது இலங்கையின் தேசியத் தேவை என்று வர்ணித்தார். இரண்டு தேசியக் கட்சிகளும் இணைந்து செயற்படுவதும், தேசிய அரசாங்கத்தை அமைப்பது என்பதும் தேச நலனுக்கு ஏற்றது என்றும், இலங்கையின் வரலாற்றில் இப்படி நடப்பது இதுவே முதல் முறை என்றும் தெரிவித்த சம்பந்தன், இலங்கை மக்கள் சமீபத்தில் அளித்த தொடர்ச்சியான இரண்டு ஜனநாயக தீர்ப்புகளுக்கு ஏற்பவே இது நடந்திருப்பதாகவும், அரசியல் சட்டத்தின் 19 ஆவது திருத்தத்தின் கீழும் இது சரியான செயல் என்றும் கூறினார்.
“நடப்பவை எல்லாம் அவசியமானது மட்டுமல்ல, நாட்டுக்கு நன்மை பயப்பதுவும் கூட. இந்த அரசு வெற்றி பெற நாங்கள் வாழ்த்துகிறோம். ஆனால், அமைச்சர்களின் எண்ணிக்கையை அதிகப்படுத்துவது என்பது நல்ல அரசாங்கத்தை அளிப்பது என்கிற கொள்கையோடு ஒத்துப்போவதாக தெரியவில்லை. அமைச்சர்களின் எண்ணிக்கையை அதிகப்படுத்தாமலே இரண்டு கட்சிகளும் இணைந்து செயற்பட்டிருக்கலாம்,” என்றார் சம்பந்தர்.
துரதிர்ஷ்டவசமாக இலங்கையில் பல்வேறு குயுக்தியான வழிகளைப் பயன்படுத்தி அமைச்சர்களின் எண்ணிக்கையை அதிகரிக்கும் அரசியல் கலாச்சாரம் சமீபகாலமாக அதிகரித்து வருவதாக தெரிவித்த சம்பந்தன், எதிர்தரப்பில் இருக்கும் நாடாளுமன்ற உறுப்பினர்களை தம் பக்கம் இழுப்பதற்கான ஒரு வழியாகவும் இது பயன்படுத்தப்பட்டதாக குற்றம் சுமத்தினார். “அண்டையில் இருக்கும் இந்தியாவில் 120 கோடி மக்களுக்கான அரசாங்கத்தில் 65 அமைச்சர்கள் மட்டுமே இருக்கிறார்கள் என்பதை நாம் மறக்கக்கூடாது”, என்றார் சம்பந்தன்.
அமைச்சர்களின் எண்ணிக்கையை அதிகரிக்கும் அரசியல் கலாச்சாரம் தேச நலனுக்கும், தேசத்தின் தேவைக்கும் எதிராக இருப்பதாகவும் இதிலிருந்து இலங்கை விடுபடவேண்டும் என்றும் அதேசமயம், தற்போதைய சூழலில் எப்பாடுபட்டேனும் தேசிய அரசாங்கம் அமைக்க வேண்டியது தவிர்க்கவே முடியாத அவசியம் என்பதையும் தான் உணர்ந்தே இருப்பதாகவும் சம்பந்தன் கூறினார்.
“எல்லோருமே அமைச்சர்களாக வேண்டும் என்கிற தற்போதைய அரசியல் கலாச்சாரத்தை முடிவுக்கு கொண்டுவரவேண்டும். புதிய அத்தியாயம் ஒன்றை நாம் துவக்க வேண்டும். அண்டை நாட்டில் (இந்தியாவில்) எத்தனையோவிதமான வேறுபாடுகள் இருந்தாலும் அரச கட்டமைப்பு என்று வரும்போது ஒரே அரசாக ஒன்றிணைந்து செயற்படும் நல்லதொரு உதாரணத்தை நாமும் பின்பற்ற முயலவேண்டும்”, என்றார் சம்பந்தன்.
மத்தியில் ஏராளமான அமைச்சர்களை கொண்டிருப்பதற்கு பதிலாக, இலங்கையை இரண்டு அல்லது ஐந்து பிராந்தியங்களாக்கி, அவற்றுக்கு அதிகபட்ச அதிகாரங்களை அளிக்கலாம் என்றும் நாடாளுமன்றத்தில் இருக்கும் மிகச்சிறப்பான நாடாளுமன்ற உறுப்பினர்கள் அனைவரும் மிகச்சிறந்த முதலமைச்சர்களாகவும் அமைச்சர்களாகவும் இருக்க வல்லவர்கள் என்றும் அப்படிப்பட்டவர்களுக்கு அதிகபட்ச அதிகாரம் கொடுத்து (பிராந்தியங்களில்) ஆளவிடலாம் என்றும் சம்பந்தன் யோசனை தெரிவித்தார்.
“இந்தியாவில் 29 மாநிலங்கள் இருக்கின்றன. ஆனால் அது ஒரே நாடாக இருக்கிறது. ஒன்றுபட்டும் இருக்கிறது. இந்தியாவில் மக்களின் மொழி, கலாச்சார மற்றும் மத உரிமைகளை மதித்து, கவுரவித்து பாதுகாக்கும் வகையில் மாநில அரசுகள் உருவாக்கப்பட்டிருப்பதே இந்தியா ஒரே நாடாக இணைந்திருப்பதற்கு முக்கிய காரணம். அதே அணுகுமுறையை நாமும் கடைபிடிக்கவேண்டும்”, என்றார் சம்பந்தன்.
READ MORE - சம்பந்தன் எதிர்ப்பு! - இந்தியாவை உதாரணம் காட்டி கண்டனம்

எதிர்க்கட்சித் தலைவராக இரா.சம்பந்தன் தெரிவு

இலங்கையின் 8 ஆவது பாராளுமன்றத்தின் எதிர்க்கட்சித் தலைவராக தமிழ்த் தேசியக் கூட்டமைப்பின் பாராளுமன்ற உறுப்பினர் இரா.சம்பந்தன் தெரிவு செய்யப்பட்டுள்ளார்.

இதனை இன்றைய தினம் சபாநாயகர் கரு ஜயசூரிய தெரிவித்துள்ளார்.
ஐக்கிய மக்கள் சுதந்திரக்கூட்டமைப்பின் சார்பில் எதிர்கட்சித் தலைவருக்கான கோரிக்கையும் முன்வைக்கப்படாமை காரணமாக இரா.சம்பந்தனே எதிர்க்கட்சித் தலைவராக தெரிவு செய்யப்படுவதாக தெரிவித்தார்.
இதன்படி, தமிழ்த் தேசியக் கூட்டமைப்பின் நாடாளுமன்றக் குழுத் தலைவரான சம்பந்தன் எதிர்க்கட்சித் தலைவராக தெரிவு செய்யப்படுவார்.
சுமார் மூன்று தசாப்தங்களின் பின்னர் தமிழர் ஒருவர் நாட்டின் நாடாளுமன்றின் எதிர்க்கட்சித் தலைவராக சம்பந்தன் தெரிவு செய்யப்பட்டுள்ளமை குறிப்பிடத்தக்கது.
READ MORE - எதிர்க்கட்சித் தலைவராக இரா.சம்பந்தன் தெரிவு

இராணுவ முகாமில் சித்திரவதைக் கூடங்கள் வெளிவரும் புதுத் தகவல்.

27.8.15

கடத்தப்பட்டு காணாமற்போகச் செய்யப்பட்ட ஊடகவியலாளர் பிரகீத் எக்னெலிகொட, தடுத்து வைக்கப்பட்டிருந்த கிரிதல இராணுவ முகாமில் சித்திரவதைக் கூடங்கள் இயங்கி வந்ததாக தகவல்கள் வெளியாகியுள்ளன.

பிரகீத் எக்னெலிகொட காணாமற்போகச் செய்யப்பட்ட சம்பவம் தொடர்பாக கைது செய்யப்பட்ட சிறிலங்கா இராணுவப் புலனாய்வுப் பிரிவினரிடம் நடத்தப்பட்ட விசாரணைகள் மற்றும் கண்டி மேல்நீதிமன்றத்தில் நடத்தப்படும் வழக்கு ஒன்றின் மூலம், இந்த சித்திரவதைக் கூடங்கள் பற்றிய தகவல்கள் வெளிவந்துள்ளன.

இதையடுத்து, ஊடகவியலாளர் எக்னெலிகொட கடத்தல் தொடர்பாக குற்றப் புலனாய்வுப் பிரிவினர் முன்னெடுத்துள்ள விசாரணைகள் மேலும் விரிவுபடுத்தப்படலாம் எனத் தகவல்கள் தெரிவிக்கின்றன.
மேலும் அடுத்த சில நாட்களில், கிரிதலை இராணுவ முகாமில், குற்றப் புலனாய்வுப் பிரிவின் சிறப்புக் குழுவொன்று சென்று நேரடியாக விசாரணைகளை முன்னெடுக்கவுள்ளதாகவும் தெரிவிக்கப்படுகிறது.
கைது செய்யப்பட்ட சிறிலங்கா இராணுவ அதிகாரிகளிடம் நடத்தப்பட்ட விசாரணைகளில்,
ஊடகவியலாளர் பிரகீத் எக்னெலிகொட ராஜகிரியவில் கடத்தப்பட்டு கிரிதலை முகாமுக்கு கொண்டு செல்லப்பட்டுள்ளதும் அங்கு அவர் சித்திரவதை செய்யப்பட்டு விசாரணைக்கு உட்படுத்தப்பட்டுள்ளதும் உறுதிப்படுத்தப்பட்டுள்ளது.

கடத்திச் செல்லப்பட்டு நான்கு நாட்களின் பின்னர், அப்போது கிரிதலை முகாமுக்கு பொறுப்பாக இருந்த- தற்போது கைது செய்யப்பட்டுள்ள சிறிலங்கா இராணுவ அதிகாரிகளினால் அவர் அந்த முகாமில் இருந்து கொண்டு செல்லப்பட்டுள்ளதும் தெரியவந்துள்ளது.

இன் பின்னர், பிரகீத் எக்னெலிகொட கொலை செய்யப்பட்டிருக்கலாம் என சந்தேகிக்கும் குற்றப் புலனாய்வுப் பிரிவு, கைது செய்யப்பட்டுள்ள சிறிலங்கா இராணுவ அதிகாரிகளிடம் தொடர்ந்தும் விசாரணைகளை நடத்தி வருகிறது.
READ MORE - இராணுவ முகாமில் சித்திரவதைக் கூடங்கள் வெளிவரும் புதுத் தகவல்.

ஈழத் தமிழனை முடக்கும் வியூகம்!

புலிகளுக்கு ராணுவத் தீர்வையும் மக்களுக்கு அரசியல் தீர்வையும் வழங்கப்போவதாக அறிவித்துதான் வன்னி மீதான யுத்தத்தை முன்னெடுத்தது இலங்கை அரசு. ஆனால், புலிகளை ராணுவ ரீதியாக அழித்தொழித்தவர்கள்,  ஐந்து ஆண்டுகளுக்குப் பிறகு ஈழத் தமிழர்களை அரசியல் ரீதியாக அழித்தொழித்திருக்கிறார்கள்.

அரசியல் தீர்வு, புனர்வாழ்வு என எஞ்சியிருந்த ஈழ மக்களின் அரசியல் கோரிக்கைகளுக்கும்  சாவு மணியடிக்க, பாம்பும் கீரியும் இணைந்த கதையாக இலங்கையில் தேசிய அரசை அமைத்திருக்கிறார்கள். ராஜபக்‌ஷவை ஓரங்கட்டிவிட்டு ரணில் விக்கிரமசிங்க இலங்கையில் பிரதமர் ஆகியிருப்பதும் அவரோடு மைத்திரி இணைந்து தேசிய அரசு அமைத்திருப்பதும், ஈழத் தமிழர்களின் அரசியல் இருப்பை முக்கியத்துவமற்றதாக்கி இருக்கிறது. எப்படி?
அதிகார முரண்பாடு!
ரணிலாக இருந்தாலும் ராஜபக்‌ஷவாக  இருந்தாலும், அவர்களின் நிரந்தர எதிரி தமிழ் மக்கள்தான். தமிழ் மக்களை பயங்கரவாதிகளாகக் காட்டித்தான், சிங்கள மக்களிடம் தங்கள் அதிகாரத்தை உறுதிப்படுத்திக்கொள்கிறார்கள் இருவரும். 2002-ம் ஆண்டில் ரணில் பிரதமராகப் பதவியேற்றதும் ராணுவ ரீதியாக வெற்றிகளைக்  குவித்துக்கொண்டிருந்த பிரபாகரனுடன் சமாதானம் பேசினார். வரலாற்றுச் சிறப்புமிக்க சமாதான உடன்படிக்கை, நோர்வே தூதர் எரிக்சோல்ஹெய்ம் தலைமையில் வன்னியில் கையெழுத்தானது. ஆனால், அந்தச் சமாதானக் காலமே புலிகளுக்குத் தலைவலியாகவும் அமைந்தது.
பல ஆண்டுகளாக இலங்கை ராணுவத்தால் நுழைய முடியாத வன்னிக்குள் புகுந்து அங்குலம் அங்குலமாக அந்தப் பகுதியை புவியியல் ரீதியாகப் படித்ததோடு, புலிகள் அமைப்பில் இருந்து கருணாவைப் பிளந்து, அதன் கட்டுமானத்தில் பாதிப்பையும் உண்டாக்கினார்கள். ரணிலின் அந்த ராஜதந்திரம் உண்டாக்கிய சேதங்களை உணர்ந்த புலிகள், மீண்டும் ரணில் பிரதமராகிவிடக் கூடாது என்பதாலேயே, 2005-ம் ஆண்டு தேர்தலைப் புறக்கணித்தனர். அதனாலேயே அப்போதைய தேர்தலில் வென்றார் ராஜபக்‌ஷ. ஆனால்,

அதே ராஜபக்‌ஷ முள்ளிவாய்க்கால் போரிலும் வென்றதுதான் துயரம்!
கடந்த 10 ஆண்டுகளாக ராஜபக்‌ஷவை ரணிலாலும் வீழ்த்த முடியவில்லை; சந்திரிகாவாலும் துரத்த முடியவில்லை. அதனால் வேறு வழி இல்லாமலேயே அரசியல் எதிரிகளான ரணிலும் சந்திரிகாவும் இணைந்து, பொது எதிரியான ராஜபக்‌ஷவை வீழ்த்தத் திட்டமிட்டார்கள். அதன் ஒரு வியூகமான சுதந்திரக் கட்சியின் செயலாளர் மைத்திரி்பால சிறிசேனவை, எதிர்க் கட்சிகளின் பொதுவேட்பாளராக்கி சிறுபான்மைத் தமிழ் மக்களின் வாக்குப்பலத்தோடு ஜனாதிபதி ஆக்கினார்கள்.  சிங்கள மக்களிடம் ஏகோபித்த ஆதரவோடு இருந்த ராஜபக்‌ஷவை வீழ்த்த,  ஜனாதிபதி மைத்திரி தன் அதிகாரங்களைக் குறைத்துக்கொண்டார். அதாவது ராஜபக்‌ஷ அளவுகடந்து தனக்கு உருவாக்கிக்கொண்ட அதிகாரங்களைக் குறைத்ததன் மூலம், பிரதமர் பதவிக்கு முக்கியத்துவம் அளித்தார்.

ஜனவரியில் ஆட்சிக்கு வந்த மைத்திரி, ஏழே மாதங்களில்  நாடாளுமன்றத்தைக் கலைத்துவிட்டு தேர்தலை அறிவித்தார். ராஜபக்‌ஷவின்  சுதந்திர மக்கள் கட்சியில் இருந்துகொண்டே, ஐக்கிய தேசியக் கட்சியின் ரணில் விக்கிரமசிங்கவை மறைமுகமாக ஆதரித்தார்.  எதிர்பார்த்தபடியே ரணில் வென்று பிரதமரானதும் வெளிப்படையாகவே மைத்திரியும் ரணிலும் இணைந்துவிட்டார்கள்.
ரணிலின் ஐக்கிய தேசியக் கட்சிக்கு பிரதமர் பதவியும் 19 அமைச்சர் பதவிகளும், மைத்திரியின் சுதந்திர கட்சிக்கு ஜனாதிபதி பதவியும் 16 அமைச்சர் பதவிகளுமாக ஆட்சியைப் பங்கிட்டுக்கொள்கிறார்கள். தேர்தலில் தமிழ் மக்கள் வாழும் வடக்கு-கிழக்கில் 14 இடங்களை வென்று மூன்றாவது இடத்துக்கு வந்த தமிழ்க் கூட்டமைப்பு, ஆட்சியில் பங்கேற்கும் ஆசையில் இருந்தது. ஆனால், சிங்களப் பெருங்கட்சிகள் இரண்டும் இணைந்து அவர்களை எதிர்க் கட்சியாகக்கூட அமரவிடாமல் வெற்றுப் பார்வையாளராக்கிவிட்டன. இது, கடந்த  30 ஆண்டுகால இலங்கை நாடாளுமன்ற வரலாற்றில் இல்லாத துயரம் என்கிறார்கள்  அரசியல் பார்வையாளர்கள்.
சோதனை, வேதனை!
நடந்து முடிந்துள்ள தேர்தலை ஒரு குறுக்குவெட்டுப் பார்வையுடன் அலசுகிறார்  யாழ்ப்பாணத்தில் வசிக்கும் குருபரன் குமாரவடிவேல்.
''இந்தத் தேர்தல் ரணிலுக்கும் மகிந்தவுக்கும் நடந்த தேர்தல் என்பதைவிட, ரணிலும் மைத்ரியும் இணைந்து ராஜபக்‌ஷவை எதிர்கொண்டார்கள் என்பதுதான் சரி. 'இந்தத் தேர்தலில்தான் நடுநிலை வகிக்கப்போகிறேன் என மைத்திரி பால சிறிசேன அறிவித்ததன் மூலம் ரணிலுக்கே தனது ஆதரவு என சூசகமாகச் சொன்னார். இவ்வளவு பெரிய அணித் திரட்டல்கள் இருந்தும்கூட இன்னும் சிங்களர்கள் அதிகம் வாழும் தொகுதிகளில், பொலன்னறுவைத் தவிர்த்து ஏறத்தாழ தனிச் சிங்களப் பெரும்பான்மை மாவட்டங்கள் அனைத்திலும் வெற்றிபெற்றது ராஜபக்‌ஷதான்.
இந்த நிலையில் அதிகாரத்தைக் கைப்பற்றுவதற்கான பெரும்பான்மை ராஜபக்‌ஷவுக்குக் கிடைக்காததற்குக் காரணம், மைத்திரி, ரணிலை ஆதரித்ததும் இதுவரை ராஜப்க்‌ஷவை ஆதரித்த 'ஹெல உறுமயவும் ரணிலுக்கு ஆதரவு வழங்கியதுமே.
குறிப்பிடத்தக்க அளவு சிறுபான்மை இனங்களைக் (மலையகத் தமிழர், முஸ்லிம்) கொண்ட மாவட்டங்களில் ஐ.தே.க பெரும் வித்தியாசத்துடன் வென்றுள்ளது. என்றாலும் ரணிலுக்கு இது பிரமாண்ட  வெற்றியும் அல்ல; ராஜபக்‌ஷவுக்கு இது மோசமான தோல்வியும் அல்ல. எப்போது வேண்டுமானாலும் ராஜபக்‌ஷமீண்டும் முழுமையான பலத்தோடு எழலாம் எனும் நிலையில், அவரை அரசியல் அரங்கில் இருந்து அப்புறப்படுத்தவே எதிரும் புதிருமாக இதுவரை இருந்த, ஐக்கிய தேசியக் கட்சியும் சுதந்திர கட்சியும் இணைந்து தேசிய அரசை அமைத்திருக்கிறார்கள்.
ரணிலுக்கும் மைத்திரிக்கும் பிரத்யேகத் தேவைகள் உள்ளன. மைத்திரிக்கு, சிறிலங்கா சுதந்திரக் கட்சியை முழுமையாக ராஜபக்‌ஷவிடம் இருந்து மீட்டெடுக்க வேண்டும். ரணில், குறைந்தது  10 ஆண்டுகளுக்காவது தென் இலங்கை அரசியலில் தமது ஆதிக்கத்தை நிலைநாட்ட வேண்டும் எனத் திட்டமிடுகிறார்!
தமிழர்களைப் பொறுத்தவரையில் தேசிய அரசாங்கத்தில் அங்கம் வகிக்கும் இரண்டு கட்சிகளும், இனப் பிரச்னை தீர்வு விஷயத்தில் ஒற்றை ஆட்சியை வலியுறுத்துபவை. போரின்போது இழைக்கப்பட்ட குற்றங்கள் தொடர்பான பொறுப்புக்கூறல் விஷயத்தில் வேறுபாடு இல்லாதவை. இது உண்மையில் சிங்கள தேசிய அரசாங்கம் என்றே கருதப்பட வேண்டும். இரண்டு கட்சிகளுக்கும் இடையே கையெழுத்திடப்பட்டுள்ள புரிந்துணர்வு உடன்படிக்கையில், இனப் பிரச்சினை தொடர்பில் குறிப்பிடத்தக்க அம்சங்கள் எதுவும் இல்லை. இதுவே தமிழர்களுக்கு எந்த நன்மையும் விளையாது என்பதற்கான சான்று. ரணிலும் மைத்திரியும் இணைந்து அமைக்கும் இந்த அரசைத்தான் அமெரிக்காவும் இந்தியாவும் ஆதரிக்கும் நிலையில், தமிழ் மக்களைப் பொறுத்தவரையில் அடுத்து வரும் வருடங்கள் மிகவும் சோதனையான காலகட்டமாக இருக்கும். மகிந்த ராஜபக்‌ஷவின் காலத்துக்கு கீழ் தமிழ் மக்கள் அனுபவித்த துயரங்களைப் போன்ற ஒரு காலமாகவே இது அமையும். ராஜபக்‌ஷவின் ஆட்சி 'வன்மையாக சிங்கள பௌத்த ஆட்சி என்றால், ரணிலும் மைத்திரியும் இணைந்து நடத்தும் ஆட்சி 'மென் சிங்கள பௌத்த ஆட்சியாக இருக்கும். நீண்டகாலப் பாதிப்புகளையும் பின்விளைவுகளையும்  தமிழர் தரப்பு அரசியலில் ஏற்படுத்தக்கூடிய சூழலே இப்போது இலங்கையில் உருவாகியிருக்கிறது'' என நிதர்சனம் சொல்கிறார்.

விசுவாசமான மாற்றங்கள்!
கடந்த ஜனவரி மாதம் நடந்த தேர்தலின்போது தமிழ் மக்களின் வாக்குகளும், தமிழ்த் தேசியக் கூட்டமைப்பின் ஆதரவும் ரணிலுக்கும் மைத்திரிக்கும் தேவைப்பட்டன. ராஜபக்‌ஷவை மைத்திரி வீழ்த்தியதே, தமிழ் மக்களின் வாக்குகளை வைத்துதான்.  தமிழ் மக்களின் வாக்குகள்தான் ரணில் மற்றும் மைத்திரிக்குப் பலமாகவும் பலவீனமாகவும் இருந்தன. ஏனென்றால் தென்இலங்கை சிங்களர்களிடம் பயங்கரவாதம் மீண்டும் தலையெடுக்கிறது என ராஜபக்‌ஷ பிரசாரம் செய்தார்.  ஆனால், இப்போது தமிழ் மக்களும் தேவை இல்லை... அவர்களைப் பிரதிநிதித்துவப்படுத்தும் கூட்டமைப்பும் தேவை இல்லை எனும் நிலையில், இனப்படுகொலைக்கு சர்வதேச விசாரணை, அரசியல் தீர்வு உள்பட எது பற்றியும் பேசவேண்டிய அழுத்தமோ, தேவையோ இனி இலங்கை அரசுக்கு இல்லை.

ஆக, கையறு நிலைக்குத் தள்ளப்பட்டுள்ள தமிழ்த் தேசியக் கூட்டமைப்பு, இனி என்ன செய்யப்போகிறது என்பதுதான் கேள்விக்குறி?
ஈழத் தமிழர்களின் பார்வையாக, கருத்துக்களைப் பகிர்ந்துகொள்கிறார்  நிலாந்தன்.
''இலங்கையில் இப்போது நடந்திருக்கும் மாற்றங்கள் மேற்கு உலகும் இந்தியாவும் விரும்பிய விசுவாசமான மாற்றங்கள். எல்லா தரப்பிலும் தீவிரத்தன்மை உள்ளவர்கள்  தோற்கடிக்கப்பட்டு மிதவாதிகள் வென்றிருக் கிறார்கள். சிங்களர்களைப் பிரதிநிதித்துவம் செய்யும் இரு கட்சிகள் இணைந்து ஆட்சி அமைத்துவிட்டு, அதை 'தேசிய அரசு - என சொல்வதை  பிற இனங்கள் ஏற்றுக்கொள்ளாது. தமிழ், முஸ்லிம், சிங்கள மக்கள் இணைந்து அமைக்கும் அரசின் பெயர்தான் தேசிய அரசு.

அமைந்திருக்கும் அரசு தமிழ் மக்களுக்கு கொடுத்த வாக்குறுதிகளை நிறைவேற்றுமா என்பதைப் பொறுத்திருந்துதான் பார்க்க வேண்டும். கடந்த காலங்களைவிட மைத்ரி ஆட்சிக்கு வந்த பிறகு சிவில் உரிமைகள் தொடர்பாக சிறிய அளவு முன்னேற்றம் வடக்குப் பகுதியில் காணப்பட்டது.

 இதை மேலும் உறுதிப்படுத்தினால் மட்டுமே, எதிர்காலத்தில் தமிழ் மக்களின் வாக்குகளை ரணில், மைத்ரி அணியினர் பெற முடியும். கூட்டமைப்புக்கும்கூட இப்படியான நெருக்கடிகள் இப்போது உருவாகியிருக்கின்றன!''
'கடும் சவால்களுக்கு மத்தியில் கிடைத்துள்ள இந்த முடிவை ஏற்றுக்கொண்டு நாடாளுமன்றத்தில் ஓர் உறுப்பினராக அமர்வேன் என்றிருக்கிறார் ராஜபக்‌ஷ.  ஏழு மாதங்களுக்கு முன்பு அரசியல் தீர்வுக்குப் பாடுபடுவேன் என தமிழ் மக்களுக்கு வாக்குக்கொடுத்த ரணில் பதவியேற்ற கையோடு சொல்கிறார்,

 'நாட்டைத் துண்டாட பயங்கரவாதிகளுக்கு இடம்கொடுக்க மாட்டோம். 'பயங்கரவாதம் என ராஜபக்‌ஷ பாணியில் ரணில் அச்சுறுத்துவது தமிழ் மக்களின் ஆகக்குறைந்த ஜனநாயகக் கோரிக்கைகளை. ஈழத் தமிழர்கள் இன்னும் என்னவெல்லாம் கொடுங்கூற்றைக் கடந்து வர வேண்டுமோ?
READ MORE - ஈழத் தமிழனை முடக்கும் வியூகம்!

வெள்ளை வேன் விவகாரம் : மேர்வினுக்கு நீதிமன்றம் உத்தரவு

25.8.15

வெள்ளை வேன் கடத்தல்கள் மற்றும் காணாமல் போனவர்கள் தொடர்பான வழக்கின்  ஆதாரங்களை சமர்ப்பிக்குமாறு மக்கள் தொடர்பாடல் முன்னாள் அமைச்சர் மேர்வின் சில்வாவுக்கு  நீதிவான் உத்தரவிட்டுள்ளார்.

இது குறித்து தெரியவருவதாவது,

இரகசியப் பொலிஸாரிடம் சில கடத்தல்கள் தொடர்பில் தமக்குத் தெரியும் என மேர்வின் சில்வா வாக்குமூலம் வழங்கியதாக நீதிமன்றத்தில் தெரிவிக்கப்பட்டது.

இதனையடுத்து எதிர்வரும் நவம்பர் மாதம் 11ஆம் திகதி ஆதாரங்களை சமர்ப்பிக்குமாறும் கொழும்பு பிரதான நீதவான் உத்தரவிட்டுள்ளார்.

மேலும் இன்று நீதிமன்றத்தில் மேர்வின் சில்வா ஆஜராகி இருக்க வேண்டும் எனினும் அவர் அவ்வாறு செய்யவில்லை என்பது குறிப்பிடத்தக்கது.

READ MORE - வெள்ளை வேன் விவகாரம் : மேர்வினுக்கு நீதிமன்றம் உத்தரவு

சுரேஷ் பிரேமச்சந்திரனை நியமிக்காதது ஏன்? சம்பந்தரின் விளக்கம்

தமிழரசுக் கட்சியின் செயல் வெட்கம் கெட்டத்தனமானது: சுரேஷ் பிரேமச்சந்திரன்

தமிழ்த் தேசியக் கூட்டமைப்பின் சார்பில் தேசியப் பட்டியல் நியமனங்கள் தொடர்பில் எழுந்துள்ள குற்றச்சாட்டுக்களையும் சர்ச்சைகளையும் அதன் தலைவர் இரா.சம்பந்தர் புறந்தள்ளியுள்ளார்.

மிகவும் ஆழமாக சிந்தித்து விவாதித்த பிறகே கூட்டமைப்பின் சார்பில் துரைரட்ணசிங்கம் மற்றும் சாந்தி சிறீஸ்கந்தராஜா ஆகியோருக்கு தேசியப் பட்டியல் நியமனம் வழங்கும் முடிவு எடுக்கப்பட்டது என சம்பந்தர் பிபிசி தமிழோசையிடம் தெரிவித்தார்.

சில கொள்கைகளின் அடிப்படையிலேயே அந்தத் தீர்மானம் எடுக்கப்பட்டது எனவும் அவர் கூறுகிறார். வடக்கு மற்றும் கிழக்கு மாகாணத்துக்கு ஒவ்வொரு இடங்கள் வழங்குவது என்று முடிவு செய்யப்பட்டது என்றும் கூட்டமைப்பின் சார்பில் பெண் ஒருவர் நாடாளுமன்றம் செல்ல வேண்டும் எனறும் முடிவு செய்யப்பட்டது என்றார் அவர். குறைந்த வாக்கு வித்தியாசத்திலேயே சாந்தி தோல்வியடைந்திருந்தார் என்பதும் யாழ் தேர்தல் மாவட்டத்தைக் காட்டிலும் வன்னி தேர்தல் மாவட்டத்தில் குறைந்த அளவுக்கே கூட்டமைப்பின் சார்பில் உறுப்பினர்கள் தேர்தெடுக்கப்பட்டனர் என்பதும் அவரது தேர்வுக்கு ஒரு காரணம் என்கிறார் சம்பந்தர்.

கிழக்கு மாகாணத்தில் திருகோணமலை மற்றும் அம்பாறை தேர்தல் மாவட்டங்களிலேயே மிகக் குறைவான உறுப்பினர்கள் தேர்வானாதால் அப்பகுதிக்கு ஒரு இடம் வழங்கும் முடிவு எடுக்கப்பட்டது என அவர் தெரிவித்தார்.

சுரேஷுக்கு ஏன் இடமில்லை?

சம்பந்தர் சுரேஷ் இடையே மோதல்கள் தொடருகின்றன

வட மாகாணத்துக்கான இடத்தை முடிவு செய்யும்போது யாழ் தேர்தல் மாவட்டத்தில் ஏற்கனவே ஐந்து உறுப்பினர்கள் அங்கு தேர்வாகியுள்ள நிலையில் குறைந்த வாக்கு வித்தியாசத்தில் ஆறாவது இடத்தை தவற விட்டவரை புறந்தள்ளி அவருக்கும் குறைவான வாக்குகள் பெற்று அடுத்த இடத்தில் இருந்த சுரேஷ் பிரேமச்சந்திரனுக்கு இடமளிப்பது குறித்து பல கேள்விகள் எழுந்தன என்கிறார் கூட்டமைப்பின் தலைவர்.

தேசியப் பட்டியல் நியமனங்கள் குறித்து கூட்டமைப்பு எடுத்துள்ள முடிவை விமர்சித்துள்ள சுரேஷ் பிரேமச்சந்திரனுக்கு பதில் கூற வேண்டிய அவசியம் தனக்கு இல்லை என்றும் கூறுகிறார் சம்பந்தர்.

தமிழரசுக் கட்சியின் செயல் வெட்கம் கெட்டத்தனமானது: சுரேஷ் பிரேமச்சந்திரன்

ட்டமைப்பினால் தேசிய பட்டியல் உறுப்பினர்களாக அறிவிக்கப்பட்டுள்ளவர்கள் தொடர்பான முடிவு என்பது தமிழ்த்தேசிய கூட்டமைப்பின் முடிவல்ல என்றும்இ அது தன்னிச்சையாகவும் ஒருதலைப்பட்சமாகவும் தமிழரசுக் கட்சியினால் எடுக்கப்பட்ட முடிவு என்றும் முன்னாள் நாடாளுமன்ற உறுப்பினரும் தமிழ்த்தேசிய கூட்டமைப்பின் பேச்சாளரும் ஈபிஆர்எல்எஃப் கட்சியின் தலைவருமான சுரேஸ் பிரேமச்சந்திரன் பிபிசி தமிழோசையிடம் தெரிவித்தார்.

யாழ் மாவட்டத்தில் தேர்தலில் போட்டியிட்ட சுரேஸ் பிரேமச்சந்திரன் தோல்வியடைந்ததையடுத்து தமிழ்த் தேசியக் கூட்டமைப்பில் இருக்கும் ஒரு கட்சியின் தலைவரான அவருக்கு தேசிய பட்டியலில் இடமளிக்க வேண்டும் என கூட்டமைப்பின் தலைவர் ஆர்.சம்பந்தன் மற்றும் கூட்டமைப்பின் அங்கம் வகிக்கும் மற்ற கட்சித்தலைவர்களிடம் கோரிக்கை விடுக்கப்பட்டிருந்தது.

ஆயினும் அந்தக் கோரிக்கை தொடர்பில் சரியான முடிவு எடுக்காமல் தமிழரசுக்கட்சி தனது விருப்பத்திற்கு இரண்டு பேரை தேசியப்பட்டியல் உறுப்பிளர்களாக நியமித்திருப்பதாக சுரேஸ் பிரேமச்சந்திரன் குற்றம் சாட்டினார்.

இந்த கோரிக்கை தொடர்பில் திருகோணமலையில் இரண்டு முக்கிய பேச்சுவார்ததைகள் நடைபெற்றிருந்தபோதிலும்இ பேச்சுவார்த்தைகளுக்கு அமைவாக முடிவு எடுக்கப்படவில்லை என்றும் சுரேஸ் பிரேமச்சந்திரன் தெரிவித்தார்.

"தமிழ் தேசியக் கூட்டமைப்புக்கான தேசியப் பட்டியலுக்கு தமிழரசு கட்சியில் இருக்கும் சில நபர்கள் தமது கட்சியின் இரண்டு உறுப்பினர்களை நியமித்திருப்பதுஇ கூட்டமைப்பில் இருக்கும் தமிழரசு கட்சி தவிர்த்த மற்ற கட்சிகளுக்கு ஏற்புடைய செயலல்ல. எல்லோரும் சேர்ந்து விதை விதைப்பதும் அறுவடை செய்யும்போது தமிழரசு கட்சி மட்டும் செய்துகொண்டு போவது என்பதும் ஆரோக்கியமான அரசியலுக்கும் நல்லதல்ல; ஒரு கூட்டமைப்பு தத்துவங்களுக்கும் நல்லதல்ல; ஆனால் இதனை மிகவும் வெட்கம் கெட்டத்தனமாக தமிழரசு கட்சி தொடர்ந்து செய்கிறது என்பதுதான் ஒரு விடயம்" என்றார் சுரேஷ் பிரேமச்சந்திரன்.

அதேசமயம்இ இந்த பிரச்சனை குறித்து தமது கட்சி இரண்டொரு தினங்களில் விரிவானதொரு அறிக்கையை வெளியிடவுள்ளதாக தெரிவித்த சுரேஷ் பிரேமச்சந்திரன் இதுகுறித்த விரிவானதொரு நேர்காணலை வழங்குவதற்குத் தற்போது தான் தயாரில்லை என்றும்இ சுருக்கமானதொரு கருத்தை மட்டுமே இப்போது தன்னால் தெரிவிக்க முடியும் என்றும் அவர் கூறினார்.

READ MORE - சுரேஷ் பிரேமச்சந்திரனை நியமிக்காதது ஏன்? சம்பந்தரின் விளக்கம்

தமிழ் மக்களின் தேசிய பிரச்சினைக்கு சாதகமான சூழல்: ரணில்

24.8.15

பொதுத்தேர்தலின் பின்னர் இலங்கையில் தமிழ் மக்களின் தேசிய பிரச்சினைக்கு அரசியல் தீர்வை முன்வைப்பதற்கான சாதகமான சூழ்நிலை உருவாகியுள்ளதாக பிரதமர் ரணில்விக்கிரமசிங்க தெரிவித்துள்ளார்.

இந்தியாவின் இந்து நாளிதழிற்கு வழங்கியுள்ள நேர்காணலிலே அவர் இதனை குறிப்பிட்டுள்ளார்.

இலங்கைக்கான புதிய அரசமைப்பை உருவாக்க ஒரு வருடம் தேவைப்படும் என ஸ்ரீலங்கா சுதந்திரக்கட்சியினர் கருதுகின்றனர், எனினும்தாம் ஆறு மாதத்தினுள் அது சாத்தியமாகும் என கருதுகின்றோம்.

புதிய தேர்தல் முறையே பிரச்சினைக்குரிய விடயமாக காணப்படுகிறது.

ஜனாதிபதி முறைமை குறித்தும் பிரச்சினைகள் காணப்படுகிறது, பிரஜைகள் குழுவினர் நிறைவேற்று அதிகார ஜனாதிபதி முறையை முற்றாக நீக்கவேண்டும் என வேண்டுகோள்விடுக்கின்றனர்.

ஸ்ரீலங்கா சுதந்திரக்கட்சி இதனை எதிர்க்கின்றது, ஆகவே இதனை நாங்கள் முற்றாக ஆய்வு செய்யவேண்டிய நிலையில் உள்ளோம், பாராளுமன்றத்தை எவ்வாறு பலப்படுத்தலாம் என்பது குறித்து ஆராயவேண்டும்.

மாகாணசபைகள் குறித்தும் நாங்கள் ஆராயவேண்டும் அவை எவ்வாறு செயற்படுகின்றன எனவும் பார்க்கவேண்டும், இவையே எங்கள் முன் உள்ளவிவகாரங்கள் என தெரிவித்துள்ளார்.

மேலும் கருத்து தெரிவித்த பிரதமர் மனித உரிமை மீறல்கள் குறித்து உள்நாட்டு விசாரணையே இடம்பெற வேண்டும் என நாங்கள் ஏற்றுக்கொண்டுள்ளோம், ரோம் பிரகடனத்தில் நாங்கள் கைச்சாத்திடாததே இதற்கு காரணம்.

எனினும் ஐக்கிய தேசிய கட்சி எப்போதும் இலங்கைக்குள் சர்வதேச விசாரணைகளை முன்னெடுப்பதற்கான நீதிஅடிப்படை இல்லை என்பதை தெரிவித்து வந்துள்ளோம், நீதித்துறையில் நம்பிக்கை இழந்ததன் காரணமாகவே பலர் சர்வதேச விசாரணையை கோரினர்.

வடக்கிலும் தெற்கிலும் முன்னர் இந்த பிரச்சினைகள் காணப்பட்டன, நாங்கள் எங்கள் அரசியல் அமைப்பிற்கு உட்பட்ட உள்நாட்டு பொறிமுறையொன்றை முன்வைக்க முயல்வோம்.

அதேவேளை அது இலங்கையின் சகல சமூகங்களிற்கும், சர்வதேச சமூகத்தினரிற்கும் ஏற்புடையதாக காணப்படும்.என பிரதமர் தெரிவித்துள்ளமை குறிப்பிடத்தக்கது.

READ MORE - தமிழ் மக்களின் தேசிய பிரச்சினைக்கு சாதகமான சூழல்: ரணில்

பூநகரியில் இடம்பெற்ற மாட்டுவண்டிச் சவாரி

தமிழர்களின் பாரம்பரிய மாட்டு வண்டி சவாரிப் போட்டி பூநகரியில் நேற்று  இடம்பெற்றது. 80 க்கும் மேற்பட்ட சவாரிகள் போட்டியில் கலந்து சிறப்பித்ததுடன் பெருமளவான மக்களும் கலந்து கொண்டிருந்தனர்.
READ MORE - பூநகரியில் இடம்பெற்ற மாட்டுவண்டிச் சவாரி

50 அடி பள்ளத்தில் பாய்ந்து வான் விபத்து: மூவர் படுகாயம்

தலவாக்கலை ட்ரூப் தோட்டத்திலிருந்து தலவாக்கலை நகரை நோக்கி பயணிகளை ஏற்றிச் சென்ற வான் 50 அடி பள்ளத்தில் பாய்ந்து விபத்துக்குள்ளாகியுள்ளது.

நேற்று மாலை 06.30 மணியளவில் ட்ரூப் தோட்ட பிரதான வீதியில் இந்த விபத்து இடம்பெற்றுள்ளது.
இவ்விபத்தில் வானில் பயணித்த சிறு குழந்தை உட்பட மூன்று பேர் படுகாயமடைந்து லிந்துலை வைத்தியசாலையில் அனுமதிக்கப்பட்டு, பின்னர் மூவரும் மேலதிக சிகிச்சைக்காக நுவரெலியா வைத்தியசாலைக்கு மாற்றப்பட்டுள்ளதாக வைத்தியசாலை வட்டாரங்கள் தெரிவித்தன.
வான் சாரதியின் கவனயீனம் காரணமாகவே இவ்விபத்து நேர்ந்துள்ளதாக தலவாக்கலை பொலிஸார் தெரிவித்தனர்.
இவ்விபத்து தொடர்பான மேலதிக விசாரணைகளை தலவாக்கலை பொலிஸார் மேற்கொண்டு வருகின்றனர்.
READ MORE - 50 அடி பள்ளத்தில் பாய்ந்து வான் விபத்து: மூவர் படுகாயம்